Baadhi ya wamiliki wa blogu nchini Tanzania wameonyesha wasiwasi baada ya wito kutolewa na Mamlaka ya Mawasiliano nchini humo wa kuwataka wafanye kazi chini ya jumuia inayotambulika.
Wito huo umetolewa katika warsha maalumu iliyoandaliwa na taasisi hiyo ambayo ilikuwa na lengo la kuwafunda wamiliki wa blogu nchini humo ikiwa ni sehemu moja wapo ya maandalizi ya uchaguzi mkuu ujao. Baadhi wanahisi kwamba utaratibu huo huenda ukawathibiti katika kupata mapato hayo.
Warsha hii imejumuisha zaidi ya mabloga mia mbili kutoka sehemu mbalimbali nchini Tanzania. Licha ya kukuwa kwa kasi kwa tasnia hii na kuwa sehemu muhimu ya kupasha habari jamii, imefahamika kwamba, baadhi ya wamiliki wa blogu hawana utaalamu wa uandishi.
Ili kukabiliana na changamoto hiyo ambayo imeonekana kuwa ndio chanzo cha ukiukaji wa maadili ya uandishi, Mamlaka ya Mawasiliano nchini Tanzania TCRA imetoa fursa kwa wamiliki hao kuanzisha jumuia itakayotoa muongozo.
"TCRA tunashughulika na mawasiliano kwa ujumla wake, lakini mtandao ni muhimu sana. Kwa hiyo katika Intanet tumeona kwamba hawa bloggers ni wadau muhimu sana lakini hamna mtu ambae amewaunganisha, kwa hiyo sisi tumefanya kikao ili bloggers wakutane ili tuwape taarifa ambazo zinasaidia katika utaalamu wao. Kimoja ambacho kimekubaliwa ni kwamba waanzishe jumuia yao, sisi hatutakwepo kwenye uongozi wao bali tunataka tuwe chachu," amefafanua Profesa John Nkoma ambae ni mkurugenzi mkuu wa TCRA.
Blogs nyingi nchini Tanzania zinamilikiwa na vijana ambao kutokana na matatizo ya ajira, wameona hii ni fursa pekee ya kujipatia ajira na kujiongezea kipato. Hata hivyo, hofu tayari imeanza kutawala miongoni mwao kwamba mabadiliko yatakayofanyika yanaweza kuathiri kipato chao.
Habiba Chagamba ambae ni mmiliki wa blogu ya Tayojo amemwambia mwandishi wa BBC Aboubakar Famau kwamba wanahofia mabadiliko yoyote yatakayofanyika yanaweza kuathiri kipato chao.
"Vijana wengi wameona soko la ajira ni la taabu, hivyo wameona hii ndio njia ya kujikwamua kiuchumi. Kwa mfano mimi blogu yangu inaniingizia dola za kimarekani kuanzia 300 hadi 400 kwa mwezi, hii si haba kwa mtanzania.
Lakini iwapo serikali itataka kukata kodi katika hayo mapato, basi hapo ndio kutakuwa na utata, kwa sababu hatujui tutakula wapi. Ndio maana tunasema jamani fanyeni mnavyofanya lakini tuangalie na sisi tunakula wapi, lakini katika suala la kodi, kila mtu lazima alipe kodi," amesema Habiba.
Kikubwa pia kilichotawala katika warsha hiyo lilikuwa ni suala zima la maadili ya uandishi hasa katika kipindi hiki ambacho Tanzania inaelekea kwenye kura ya maoni ya katiba iliyopendekezwa na uchaguzi mkuu ambavyo vyote vinatarajiwa kufanyika mwakani katika vipindi tofauti.
Assah Mwambene ni msemaji wa serikali ya Tanzania.
"Kiutaratibu sisi kama serikali hatudhibiti mitandao ya kijamii. Tunachotaka sisi ni kuwatambua, tuwajue wako wapi, wanafanya nini, lakini la pili walau tunaweza kuwaambia, jamani hapa tunaona mmekwenda vibaya au vizuri sana," amesema Assah Mwambene ambaye ni msemaji wa serikali ya Tanzania na kuongeza, "hatuwezi kukataa kwamba vyombo hivi ni muhimu na ni mchakato muhimu wao kushiriki lakini wakiwa na uelewa mpana wao wenyewe kwa sababu wana wajibu mkubwa katika jamii wanayoifanyia kazi."
Tanzania ina blogu zaidi ya elfu mbili lakini ni wachache ambao wameweza kujinyakulia umaarufu wa ndani ya nchi na nje kupitia kazi zao za blogu kama vile Issa Muhiddin Michuzi na Father Kidevu.
Kwa habari za Matukio Kitaifa, Kimataifa, Michezo na Burudani, Ungana nami kupitia Link zifuatazo hapo chini.
In order you follow me just click one of the Icon Button above.
